Ohiturek denbora behar izaten dute errotzeko eta Itziarren horren adibide da Erromeria Eguna. Aurten hamalaugarrena izan da eta, beti bezala, maiatzaren lehendabiziko zapatuan ospatu da. Egun osoko egitaraua osatu da aurten ere, goizean hasi eta goizeko ordu txikietaraino.

Gaur egun, oso errota gutxi mantentzen dira zutik eta are gutxiago dira oraindik ere funtzionamenduan daudenak. Gipuzkoan martxan jarraitzen duten instalazio hidraulikoetako bi Lasturko San Nikolas auzoaren bihotzean daude. Maitane Beristain (Lastur, 1980) da ondarearen ikuspegitik "erlikia" diren Plazaolako erroten "sekretuak" ezagutarazteaz arduratzen den pertsonetako bat; hogei bat urte daramatza zeregin horretan.